政Whats噏：梁栢賢着袍呃Like　慶細女畢業

醫院管理局行政總裁梁栢賢(PY)因乜事會着住件畢業袍，仲要身在外國？佢幾時去咗讀書呀？原來唔係佢畢業，係佢細女大學畢業，因為開心得滯，穿上阿囡件畢業袍嚟影相，放上Facebook「吸like」啫！有朋友睇完都話：「唔講係你位千金畢業，仲以為係你畢業典禮添！」

之前PY已預告今年5月會放個短假期，同埋太太、大女一齊去美國，參加細女大學畢業典禮。PY對「寶貝女」當然有口齒，應承咗就成家飛過去觀禮及慶祝，仲開心到借阿囡件袍着住「po」相上網，享受一家人快樂時刻咁話。一睇佢張相就知佢由個心笑出嚟、一家人合照「甜到漏」！

靚相成功吸近500個Like！朋友見到紛紛留言恭喜PY，兩個女都畢晒業，做父母就安樂晒！前線醫生聯盟副主席蕭旭亮留言話：「唔怪得可以退休原來細女都出身了！」亦有朋友提醒PY下年要退休，即係都就快輪到佢「畢業」喇喎，所以要繼續做好餘下工作，唔好令市民失望呀！PY作為「拆彈」專家，又咁受前線歡迎，要以好成績順利畢業，睇怕無難度啩！