每日一片：起飛腳怒踢阿伯　惡漢聞報警即笠水？

港鐵鬧劇日日新鮮！今日(29日)中午港鐵又上演一場惡漢踢人狂爆粗事件。有目擊者爆料，一名女子在車廂內疑被一名阿伯撞到，其男友即上前護花，「起飛腳」踢人兼爆粗與老伯對罵，一名四眼年輕男乘客見義勇為，出言指摘惡漢，更稱要報警「做證人」，惡漢聞言，即與女友「笠水」離去。

今日中午12時許，有網民在港鐵車廂拍得一段片段，片段開始，阿伯與惡男及其女友已經在車廂發生爭執，片段並沒有拍得惡男起飛腳一刻，不過阿伯神情平靜，不斷解釋撞及女方是無心之失，但惡男聲大夾惡反駁，其女友亦在一旁幫口，期間一直在旁打機的四眼男乘客亦看不過眼，怒目對方，惡男隨着回敬一句：「睥咩呀，四眼仔！」，四眼男聞言亦不示弱：「我可以做證人...你起腳踢阿伯！」、「我叫你唔好再咁兇人！」，惡男反斥：「佢撞我條女呀！非禮嚟㗎呢個係！」最後四眼男指會報警處理，但惡男及其女友則趁車門開啟時急急下車離去。