政Whats噏：仲用Call機？陳沛然話已改用SMS

傳呼機(Call機)已經愈嚟愈少有人，皆因其功能已逐漸被手提電話取代，仲用緊Call機嘅人已相當少數。今日(29日)嘅立法會人事編制小組委員會上，醫學界議員陳沛然發言時身上突然傳出嗶嗶聲，就惹來一班議員關注，搞到有人好驚訝咁問「仲用Call機？」換來一陣笑聲。

陳沛然即時喺會上解釋指醫生要用Call機，而事後向佢查詢時，佢就直言Call機有比手機優勝嘅地方，好似地庫同角落等手機信號差嘅地方，Call機都仍然能夠運作到。不過，佢其實已經無用Call機多年，因為維修服務只限辦公時間，而且服務費用唔平咁話，所以唔少醫生都改用電話短訊(SMS)取代Call機。

既然佢身上無Call機，咁到底係咩發出嗶嗶聲？陳沛然話自己將SMS鈴聲改做Call機響聲，因為響起時其他人都覺得有正經事，可以避免尷尬情況。至於今次收到SMS並非醫院有事，而係立法會秘書處提示輪到佢發言。