政Whats噏︰邱騰華座駕公然鏟上行人道違泊

違例泊車已經係唔啱，政府車輛公然違泊，仲鏟埋上行人路就更加唔應該。有讀者向東網爆料，今晚(2日)9時30分喺新蒲崗康強街見到一架車牌為「AM8」嘅政府車輛泊咗喺單黃線禁區位置(禁區時間為早上7時至晚上7時)，架車仲要鏟上行人路，真係離晒譜！

車牌「AM 8」係現正署任財政司司長一職嘅商務及經濟發展局局長邱騰華嘅專用座駕。讀者爆料時話，雖然車入面冇人，但架車旁邊就企咗個衣着打扮似司機嘅男人，好似等緊老闆咁款。

經常都同警方合作處理違泊問題嘅東區區議員趙家賢知悉後都話，政府為打擊違例泊車問題，最近俗稱「牛肉乾」的交通違例定額罰款都加咗價，但依家政府高官帶頭在行人路上違泊，真係「有冇搞錯」咁話。

政府回應指，有關司機在載送局長到達目的地後，將車停泊在非禁區地點等候，並曾將車泊上行人道上。局長其後向司機了解情況，已囑咐司機必須謹慎和遵守交通規則，局長就事件致歉。