政Whats噏：廖振新用老婆名增持物業慳辣稅？

本港樓價愈升愈癲，市民距離置業夢愈拉愈遠，港府束手無策，只好頻頻「出口術」警告加息殺到嚟，呼籲上車前要諗清楚風險，圖減低市民買樓意欲。不過，口裏說不，身體往往卻很誠實，發展局副局長廖振新似乎睇好後市，上月申報佢老婆購入一個沙田區住宅單位作自住用途，唔怕高位入貨之餘，用老婆名義買樓仲有機會慳番一大筆辣招稅添，唔少望樓輕嘆嘅星斗市民見到真係得個「恨」字。

市民難買樓，土地單位供應又遠水不能救近火，政府近日連開徵新樓空置稅都諗埋，十足窮人思舊債。不過，負責覓地造地、職責同樓價息息相關嘅發展局副局長廖振新，似乎就唔信政府幫到樓市降溫喎，皆因佢喺上月4日喺其問責官員利益申報中，新增其擔任家庭主婦嘅老婆喺沙田區擁有一層自住單位。根據差餉物業估價署嘅數據，私人住宅售價指數已連升25個月創歷史新高，換言之，廖振新夫婦唔怕喺升浪中入市，即係對後市充滿信心啦！

根據廖振新去年8月上任時作出嘅利益申報，佢繼承咗廖父喺元朗嘅一間村屋同一片農地約17%業權，而佢老婆原先只擁有內地東莞物業，所以今次佢用老婆而非自己名義去買，好大機會可以避開針對擁有多於一項物業而徵收樓價15%嘅「從價印花稅」樓市辣招喇。官員喺呢個時候買樓，真係求神拜佛政府唔好之後再推出樓市加辣招，否則水洗都唔清，搞到成為今屆首名因偷步買樓而落台嘅副局長就唔好啦！

至於廖振新嘅村屋同農地業權曾經惹來囤地疑雲，佢其後表示屋同地係嚟自廖父嘅遺產，當完成手續後會避嫌將業權轉讓兄弟姐妹，但至今過咗9個月，利益申報仍然顯示佢擁有上述業權。廖振新回覆查詢時只係重新確認申報嘅內容，承認在4月底買樓，以及承認村屋同農地嘅遺產仍在處理中，情況未有轉變，就算他自己買樓都毋須付15%印花稅。

另外，有兩位問責官員都申報自己太太由家庭主婦變為再就業。創新及科技局副局長鍾偉強喺今年2月申報太太職業為數碼營銷行政工作，唔知同佢主責嘅創科政策有無利益衝突呢？至於政制及內地事務局局長聶德權亦喺去年12月申報太太擔任行政工作，但就無交代係咩行業喇。