政Whats噏：游蕙禎前議助立會做實習被逐

青年新政前立法會議員游蕙禎及梁頌恆，2016年衝擊立法會會議室，兩人早前被裁定參與非法集結罪罪成。然而游蕙禎前議助李宗澤去咗公民黨郭家麒議辦做實習，今日(12日)返工無耐就被要求離開立法會，皆因佢係立法會黑名單人士！

李宗澤傍晚喺社交網站發貼，話按課程需要今年要到政黨實習，今朝11點好順利進入立法會到郭家麒辦事處返工，點知下午就被通知係黑名單人士要即時離開。經交涉後，佢喺完成工作後先走，但就講番當日游梁衝會議室，自己只係執行職務，事後有份坐同一部?就入咗黑名單。

佢又話，事隔一年半，期間無入過立法會，而「老細(游蕙禎)都坐埋監」，點知仲有黑名單，「想讀書做個普通人都要搞我」，希望行管會快啲解禁令。

郭家麒回覆查詢時話，事前無篩選，強調只要係大學生想學嘢都會請。佢今午喺立法會開緊會時，秘書處通知李宗澤係黑名單內人士要離開，佢立即要求核實身份，而最後秘書處畀咗張2016年11月8日嘅新聞稿佢睇，行管會禁止13名議助進入立法會，而李宗澤係其中一人。

佢對事件感到詫異，話禁入法庭都要落禁令，行管會無機制檢討，咪有人一世都禁足立法會？佢將去信行管會要求跟進及交代，期間李宗澤會到其地區議辦工作，不會影響實習。

秘書處回覆查詢時表示，行管會於2016年11月8日決定，不容許13名人士進入立法會綜合大樓，直至另行通知。

翻查資料，梁頌恆前助理錢家傑去年就禁足立法會提司法覆核。