政Whats噏:鄭泳舜撳錯掣 反問得唔得

2018年06月13日 20:29
東網電視
更多新聞短片
鄭泳舜蝦碌撳錯發言掣。

不時都會有立法會議員撳錯掣而出現尷尬嘅情況,今日(13日)就輪到議員鄭泳舜,好彩佢只係撳錯發言掣,而唔係投錯票,所以都算係好小兒科喇!

今日嘅立法會會議有6條口頭質詢,每條口頭質詢會有22分鐘,而當第一條口頭質詢去到20分鐘時,就輪到鄭泳舜發言,點知會議廳出現冷場,其後佢就有啲尷尬咁話唔好意思,解釋話撳錯掣,仲問主席得唔得喎,之後就迅速輪去下一個撳咗掣嘅議員發言。

其實,過往立法會都出現鬥快撳掣發言嘅情況,希望把握僧多粥少嘅發言機會,不過鄭泳舜就話自己唔係反應太快,只係見第一條質詢已經去到近20分鐘,諗住撳定掣排隊為下一條口頭質詢發言,好彩去到第二條質詢時都順利問到啫。佢仲話雖然進入立法會時間唔係太耐,但都開始熟悉《議事規則》嘞!