政Whats噏:立會研引入罰款 議員趕出場要「停賽」

2018年06月14日 10:50
東網電視
更多新聞短片
謝偉俊指,議事規則委員會將研究是否向被逐議員施以罰款,甚至不准落場。(設計圖片)

每當立法會審議具有爭議性嘅議題時,不時都會上演「動作片」兼且愈演愈烈,有幾位一線「小生」更係被抬嘅常客。有建制派議員就認為泛民次次被趕都無後果,「世界盃都有罰停賽喇」,建議研究向被多次逐離場嘅議員罰款,甚至唔准落場喎。嘩,咁就好益民主派,大條道理搞完事唔使再去開會?

早排立法會《廣深港高鐵(一地兩檢)條例草案》法案委員會審議到尾聲時,民主派議員幾度衝到主席台表達不滿,令到會議要暫停,更有議員被抬出會議室外。呢類「動作片」自修改《議事規則》後,已經甚少上畫,皆因新修訂規定被逐議員不得重返同一個會議開會,民主派議員都怕被趕走晒後,連「留名」投票嘅機會都無埋。

之不過,似乎咁嘅懲罰仲未夠。議事規則委員會主席謝偉俊今日(14日)出席電台節目時就話,唔少人都認為,即使議員被逐出場都無後果,唔使負責任。佢更以世界盃為例,球員踢波被趕出場,起碼都要停賽一場喇,就算其他國會都會有後果要負責。佢仲話議規會將會研究進行罰款,同埋議員唔能夠出席會議嘅時間長度,直指如果多次被逐離場,整個年度都唔准落場。

查實每次抬議員,多多少少都會有保安受傷,而且有部分活躍嘅泛民「小生」都有啲噸位,唔係咁易抬得走。聽聞立法會內部曾經就「抬議員」掀起一番討論,有建議用輪椅推走議員,而考慮到會議廳有梯級唔方便就否決咗。另有人建議用擔架床,將被逐嘅議員綁喺床上抬走,不論點扭擰都易發力抬,更無咁易整傷保安,可惜有意見認為用擔架床「好肉酸」,決定都係用番人手抬就算。

民主派度計扭過保安,試圖衝主席台、企上枱等,而保安同秘書處就要諗點防守,政府同建制派更要防突襲等,早已經掀起各方各面嘅討論。與其嘥時間傾計出招同拆招,班議員不如花更多時間去做正經事好過喇!