政Whats噏:林琳下月赴法影婚照 減肥零進展

2018年06月14日 21:19
東網電視
更多新聞短片
林琳即將影婚照,但依然輕鬆面對減肥進度落後。(葉華英攝)

結婚係人生大事,唔少女性都會喺婚前減肥,務求喺大婚時以最佳狀態示人,不過年尾出嫁嘅荃灣區議員林琳就有別一般嘅女性,事關下月遠赴南法影婚紗相嘅佢,至今仲未開始減肥囉!

林琳話婚紗特登買大啲,假如減肥成功可以改窄,減唔到肥又可以照着,似乎佢無乜減肥決心喎。不過,佢就話已相約朋友去做運動,同埋距離大日子仲有半年時間。而另一個令林琳放心嘅原因,就係佢未婚夫身型都偏肥,佢講笑話兩個拍埋一齊就唔會覺佢肥,至於婚紗相都可以靠執圖喇!

佢仲話特登趁下月有一個星期空檔就飛去南法影相,其他事宜好似度蜜月都仲未諗。不過今次南法之旅無得二人世界,因為佢同未婚夫都會帶埋媽媽同行。佢解釋,喺地區見唔少長者身體會突然變差,無法再去旅行而心情低落,所以自己都要把握機會帶媽媽去玩多啲。