政Whats噏:音樂噴泉觸礁 譚文豪陸頌雄被促交代

20180616
東網電視
更多新聞短片
工務小組否決觀塘海濱音樂噴泉項目,陳振彬指譚文豪及陸頌雄要交代。(設計圖片)
觀塘海濱音樂噴泉社區重點項目近日喺立法會工務小組委員會以一票之差被否決。觀塘區議會主席陳振彬今日(16日)出席一個活動時,講起好多居民成日問佢幾時有噴泉畀小朋友玩水,仲大爆投反對票嘅九龍東議員譚文豪都要向居民補鑊。至於盛傳下屆有意落腳九龍東直選嘅勞工界議員陸頌雄冇投票,陳振彬講到明,如果陸參選,咁好容易被人攻擊,要好好向市民解釋,睇嚟佢想噴醒啲議員喎!
陳振彬批評,觀塘海濱音樂噴泉項目有政治滲入,反對派為反對而反對,譚文豪都要向居民補鑊,因為譚賴當局事前冇就項目諮詢麗港城業主立案法團,「冇諮詢同市民需要係兩件事」。對於譚聲稱噴泉浪費食水,陳批評呢個理由好笑,「佢(譚)都唔知噴水池啲水係循環嘅」,所以今次就項目投反對票嘅議員,將來再參選立法會九龍東選舉,居民一定唔支持。
至於聽聞因為要入院而無法投票嘅陸頌雄,翌日又安然無恙現身立法會,陳就話,留番有關部門同陸傾啦,最重要係議員吸取今次經驗,要覺得立法會係「全神貫注工作嘅地方」。陳又話,冇聽過陸有意落戶立法會九龍東,亦冇詳細問佢點解會「甩轆」冇投票,佢最關注係點同居民交代事件。不過,陳警告,今次冇投票又想參選嘅話,就一定要好好同市民解釋,亦好容易被人攻擊。
雖然項目被工務小組否決,但其實政府仍可以直接將項目提交財務委員會審議。陳話,唔會「夾」政府咁做,因為涉及程序問題,希望政府諗下點樣安排,因為好多市民想立法會休會前可以通過項目。民政事務局局長劉江華今日出席另一活動時話,局方希望協助區議會落實地區工程,現階段會就項目聽取各方意見,再決定會否繼續向財委會爭取撥款。今次建制派甩轆唔夠人投票搞出個大頭佛,睇嚟都係要政府做醜人硬闖財委會喇!