已故立法局議員吳明欽女兒吳思諾，早前被委任為青年發展委員會(青委會)委員。而佢今日(16日)出席一個座談會就被問到對青委會嘅睇法，作為委員嘅佢就大潑冷水，不過換來同場另一名青委會委員、荃灣區議員林琳踢爆佢無開會。

吳形容青委會係密室會議，而且委員有部分為富二代，委員間嘅職業背景差異大，但已經算係成功青年人，有自己嘅事業成就，質疑佢哋感受唔到年輕人嘅無力感。而首次大會上都無乜討論青年政策，直言對於青委會可以令政策有進展感到絕望，更話唔使對青委會抱太大期望喎。

林琳就係由青年事務委員會過渡至青委會，聽完吳思諾呢位新委員嘅意見後就建議對方多啲參與會議，踢爆3個小組委員會都唔見吳參與，更表示對佢用排斥嘅態度加入青委會覺得驚，擔心對方會Hea做咁話。

吳就解釋咁啱唔喺香港，而現時委員睇法分歧，就建議政府唔好再搞閉門會議，而係搞直播畀大家一齊評論。雖然林琳同佢意見大不同，但就表明認同佢呢個建議。