搜查線：停業告示感動街坊　老闆：太太成就我一生

「人生苦短，生老病死，無人能免。」早前大埔一間餐廳東主因為太太身患危疾而貼出停業告示，感動了不少網民。近日有街坊發現餐廳復業，東主Leo亦終於露面，原來復業是太太的意思，要他堅持將餐廳經營，給子女好的生活。他現時事業家庭兩邊走，盼有奇蹟出現。「好似睇係我照顧佢、我扶持佢。其實係佢救咗我。佢係我嘅家人、佢係我嘅愛人，亦都係構成我生命最緊要嘅一個人。」

憶述二人仍是戀人時，現時即將30歲的Leo不禁露出甜笑，「惟獨係佢，佢好單純，又好難追。」二人的愛情故事由網上聊天室開始，直至一年後傾了一晚通宵電話後，才成功約得現年27歲的太太去看電影。「太太同我結婚6年，我哋一齊經歷好多。」他深深吸一口氣，哽咽地繼續說下去：「當時我經歷人生最失意嘅時候，連佢身邊人都叫佢考慮清楚，但係佢都係不離不棄，冇怨過一句。」

不少客人稱讚Leo待太太好，但在他心目中，太太才是無時無刻幫助他的人。「如果冇佢，當我鑽牛角尖嘅時候，如果唔係佢呢，可能我就已經諗歪咗，其實係佢救我。」

Leo的太太安兒在2016年尾因腰骨痛楚無法行走而求醫，發現脊骨已被癌細胞侵蝕，踏上抗癌的路。適時兩夫婦正籌備開設餐廳，為着生計，他們仍決定新餐廳開張。餐廳每逢周一都會休息，實際上是因Leo要陪同太太到醫院覆診。「初初都會擔心啲客覺得我懶，諗點解釋逢周一要休息，我會同啲客講唔同嘅理由，話我飲醉咗呀、玩夜咗之類。」

他認為家事還家事，並沒有公開太太病情，甚至店中員工亦是最近才知道老闆娘生病。「我覺得冇咩需要同人講家事吖，但係最近太太(病情)惡化得快，想陪佢多啲，先會講出嚟。」今年初，安兒的病況轉差，開始頻頻發燒，精神亦不好。Leo只好將餐廳停業，並在門外貼出告示，「愛妻病入膏肓，求蒼天憐憫，身為人夫，責無旁貸，只想日夜相伴，望有奇蹟發生，功名利祿，放諸一旁。」

那時候，安兒的病況急轉直下，「醫生都叫我哋要有心理準備。」當時安兒在醫院接受輸血，既無法下床，亦吃不下嚥，更一直發燒，Leo只好在床邊陪伴她。「嗰種無助係，你望住佢，但係咩都做唔到，咩都幫唔到佢。佢痛，你唔可以幫佢痛。」

告示一出，不少街坊都在鐵閘外張貼打氣的紙條，更有人貼上醫生的聯絡資料。Leo將紙條儲起，貼在床邊，讓安兒感受到街坊的支持。「太太都有逐張逐張睇，一間小店可以做到咁，我哋都覺得無求喇......」

近日醫生見安兒情況有所好轉，便讓她出院休養。「返到屋企之後，你眼望我眼咁」，安兒提議Leo將餐廳復業，一來可以減輕經濟負擔，二來可以跟熟客交代及道謝。停業期間，不少身邊朋友曾表示可「頂手」，他承認曾經有動搖，「可以有多筆錢畀我太太醫病。」不過，安兒極力反對：「你一定要守住呢間舖，如果唔係我就唔做化療。」考慮到仍要供養分別7歲和5歲的子女，Leo只好答應，咬緊牙關撐下去。

現時癌細胞已在安兒體內擴散，剛開始接受化療時，情況有好轉，但仍無法控制病情，需要做基因檢測，找合適的治療方法。Leo無奈說：「係唔係好人都冇好報，我哋經歷咗咁多，終於有少少成績，點解要咁對佢......希望可以一齊睇住啲仔女大，就夠喇！」