政Whats噏:佛系黃定光突然醒神 鬧爆撤對沖

20180619
東網電視
更多新聞短片
黃定光於會上痛批取消強積金對沖。(高嘉業攝)
在會議時常被人拍得昏昏欲睡嘅進出口界立法會議員黃定光今日(19日)突然鬼打都無咁精神,不單主動提出第二輪發問,更厲聲質問政府高官不知民間疾苦,究竟係咩令呢位看破世事嘅議員動氣,咪就係取消強積金對沖囉!身為4名助理嘅僱主,黃話一旦兩年後做唔到議員,遣散費總共要畀768,750港元,就算政府肯畀一半,都要成38萬港元,又話好多中小企都好似佢咁唔知點算。
立法會工商事務委員會今日討論政府就取消強積金對沖安排嘅初步構思,黃定光唔單止「一反常態」提問,更字字鏗鏘地質問到場的勞工及福利局局長羅致光,話如果兩年後做唔到議員,佢就要畀遣散費4個助理,佢哋嘅年資由4到16年不等,加埋要76萬幾港元,真係唔知點算。而呢個時候佢嘅發言時間已超時,主席胡志偉就出口叫停,但黃聞言即說︰「我好耐都冇講嘢啦!畀我講吓都得啩!」胡亦不敢逆佢意,繼續畀佢講埋。
不過,羅致光叫黃定光唔使咁擔心,因按照政府嘅立法時間表,取消對沖最快要到2022年先實施,佢兩年後選唔到都可以繼續對沖,又話就算黃喺2020年連任,做到2024年,佢只需額外畀多兩年不可對沖嘅額外開支,因為取消對沖係無追溯力。唔知係咪畀羅致光踢爆無溫書,黃定光竟反駁說:「我唔係講呢條數,係話緊係啲仔、啲孫個代呀!到時跳樓都唔掂!」