政Whats噏：問題答得唔好　馮檢基被卿姐窒

早前有傳民協前立法會議員馮檢基將會退黨參選，他較早前原訂舉行傳媒茶敍交代事件，但卻突然取消。馮檢基今日(19日)出席前立法會議員劉慧卿(卿姐)節目時，回應多條問題都扭扭擰擰，被卿姐多次窒佢。

卿姐問佢點解突然取消記招，係咪退黨，馮檢基話有啲事處理中，傳聞嘅嘢唔答，依家仲係民協中常委。劉慧卿反駁「車，你唔好問我依家仲係咪民主黨」。

馮檢基又提到早前流傳佢加入建制派立法會議員梁美芬嘅陣營，覺得有咁多傳聞，好難逐一回應。卿姐不認同佢嘅睇法，應為馮只要答唔係，就會冇咗呢個傳聞。至於會否參與九西補選，馮檢基就聲稱忙於準備出版新書，依家唔得閒諗呢個問題。

卿姐又質疑為何民協不選擇以元老級人馬去支持年輕人出戰立法會選舉；馮指人選係以民協內部初選決定，機制包括民調。卿姐認為，民協老資格人士都可以自行決定係咪支持年輕人，以自己為例，「我依家做民調，我都贏啦」。

講起上次補選「屈機」事件時，馮檢基話，當時一間傳媒機構及真普選聯盟召集人鄭宇碩，都攞住若泛民參選人姚松炎被取消參選資格後，有何後備人選嘅名單，馮當時以為好多傳統民主派已經支持呢件事。卿姐再次唔認同佢嘅睇法，反問佢係咪覺得鄭宇碩可以代表整個民主派，質疑馮並非唔識其他民主派人士，為何唔直接問佢哋。

不過，有一件事卿姐係認同馮檢基嘅，馮檢基提到上次補選後，曾經去信要求民主動力改善初選機制，至今仍然未獲回覆，民主動力只有回覆傳媒話不會檢討。卿姐認為民主動力應該回覆馮檢基。