政Whats噏：發叔生平成書　養了哥教嗌發哥

有「新界王」之稱嘅鄉議局前主席劉皇發(發叔)喺去年病逝，加上擔任鄉議局主席超過30年，淨係生平都有排講。而呢個大工程就由鄉議局執委廖書蘭負責，除咗喺下星期出書講鄉議局歷史，亦預料喺明年年尾出書講述發叔嘅故仔喇！

廖書蘭透露，兩本書工作同期進行，用上十年時間先完工，其中有關發叔嘅一本書就訪問唔少發叔身邊人，包括有發叔媽媽、司機、同村兄弟等，其中就喺發叔媽媽口中得知，發叔細個養過了哥，更親自教佢講「發哥」，所以每次發叔返屋企，了哥都會不停講「發哥返嚟」，氹到發叔好開心。

另外，鄉議局副主席林偉強批評政府對原居民歷史唔夠認識，希望睇過新書增加認識，相信會為官員帶來啟發性，仲建議要將呢本講述鄉議局歷史嘅書送畀所有官員添，而廖書蘭就話遲下更會喺書展上舉辦專題講座。