政Whats噏：天價橋氹落疊　議員嗌呃鬼食豆腐

造價逾17億港元嘅元朗高架行人天橋，呢條被外界稱為「天價橋」經歷幾許風波，今將闖關立法會財務委員會審議。但近期有唔少市民熱議項目太貴，令政府「騰雞」要四出箍票。據了解，路政署曾私下向議員許下諾言，只要立法會先批撥款，日後就喺招標書加入不同條款以滿足議員要求，甚至研究減少造價。正所謂「過咗海就係神仙」，呢招「先科水、後減磅」嘅做法，係咪氹到議員落疊呢？

「天價橋」項目撥款臨上財會就被揭要斬去沿明渠兩旁嘅樹木，一再刺激起市民不滿「求保育」，愈多呢類「負面消息」浮面，政府就愈「震騰騰」。而建築、測量、都市規劃及園境界議員謝偉銓同民主派都已表明反對，合共27票，建制派則有39票，只要有6名建制「倒戈」，項目就「危危乎」嘞！建築界五大專業學會日前仲分別同運輸及房屋局局長陳帆及幾位獨立議員會面，若果政府再唔出手就麻煩喇！

據了解，路政署有同部分議員「傾偈」，期間曾游說議員先批出撥款，他日招標時，列明要求以滿足議員訴求，仲會研究吓點樣令價錢平啲。身兼元朗區議員嘅工聯會立法會議員陸頌雄就話，得悉目前有技術可以喺溶洞打樁唔使咁深，可能造價會平少少，佢係主動同路政署傾，對方都話可以喺標書處理，所以佢會支持項目。

聽落好似好筍，但亦唔係個個落疊，有議員已經兜口兜面拒絕咗政府嘅誘惑。而獨立建制派何君堯則提三不滿，包括不滿價錢貴、不滿用溶洞做藉口，同不滿使公帑唔使諗價格。佢話好尊重區議會嘅努力，但「公帑唔係咁使」，覺得好唔高興。政府有無摸底？佢就話無，不過係真嘅話，佢就炮轟政府「呃鬼食豆腐」！

至於其他獨立議員，大部分都聲稱未決定點投票，目前只有實政圓桌田北辰、獨立謝偉俊同工業界吳永嘉話傾向支持，而元朗區議員兼民建聯立法會議員梁志祥就好堅定，講明勢必支持。

大嗱嗱用17億元起一條只有540米長嘅天橋，市民同議員都覺得貴嘅時候，如果真係有得平啲啲，點解政府唔可以攞上枱面講？政府唔敢承擔，只求項目快手開波以息事寧人，公帑係咪使得好就有待評價喇！