政Whats噏：眾志扮哥斯拉　港鐵內惡搞國歌涉違附例

香港眾志尋晚(24日)發起「哥斯拉行動」，喺Facebook直播，3名眾志成員戴上哥斯拉頭套，分別喺港鐵荃灣線車廂內，同埋中環站與香港站之間嘅通道內多次高唱改編咗嘅惡搞版國歌，期間仲有其他成員派傳單畀乘客，話希望引起市民關注嚟緊嘅《國歌法》。不過眾志咁做其實或違港鐵附例，依家佢仲自己拍埋片做紀錄，如果港鐵追究起上嚟，都可謂證據確鑿，都幾難走得甩喇！

到底眾志犯咗咩條例呢？首先港鐵附例第32b條清楚寫明「除非得到港鐵公司書面特准，否則任何人不得在鐵路處所任何部分派發任何書籍、單張、其他印刷品或任何樣本或其他物品。」所以派傳單就係眾志第一樣違規。

派傳單唔得，咁直播同唱歌又得唔得？睇番港鐵附例第25同26條，分別列明「任何人不得在列車上或在鐵路處所任何部分作出對其他乘客造成滋擾或煩擾的行為」，以及「除非得到港鐵公司的特准，否則任何人不得在鐵路處所的任何部分唱歌或跳舞，或演奏任何樂器或以任何樂器作表演。」雖然未知香港眾志嘅行為有冇構成滋擾，但唱歌就係不爭嘅事實，是為眾志第二樣違規。

不過，港鐵回覆東網查詢嘅時候就話唔清楚短片嘅拍攝時間，只呼籲乘客顧己及人，同埋話如果有乘客覺得滋擾，可以即時同職員聯絡同跟進。問到今次會唔會追究眾志，港鐵就只係話暫時未有資料，唔通港鐵覺得係小事一樁，打算放生眾志？