政Whats噏:攞威擺建制上枱 田北辰反呻被玩死

20180707
東網電視
更多新聞短片
田北辰大呻被人玩死,話再做小組主席都冇意思喎!(設計圖片)
港鐵沙中線醜聞爆不停,唔少民主派議員都如獲至寶,接連提出引用《立法會(權力及特權)條例》(特權法)去調查,但令人意外嘅係,連被指為建制派壞孩子、立法會鐵路事宜小組委員會主席田北辰都玩埋一份,有建制派更感覺被擺上枱陷入兩難局面,最終田被建制派自己友群起攻之。不過,他反而大呻被人玩死,仲講到意興闌珊,話再做小組主席都冇意思喎!
田提出引用特權法動議,在昨日(6日)內務委員會上先作討論,而最近兩次立法會大會亦討論過引用特權法,兩次都未獲建制派支持,但部分地區直選出身嘅建制派議員已經飽受壓力。而田作為建制派都提出特權法,就令到該派陷入困局,在內會前一日,政圈更指佢嘅動議能夠在內會通過,因為只需要在席過半數贊成就得,留待周三大會才經分組點票否決,等直選議員可以同選民交代。
不過,昨日嘅內會就峰迴路轉,建制派展示出團結嘅一面,群起攻擊田北辰,好似民建聯陳恒鑌就批評田一時一樣、朝秦暮楚;田嘅前黨友、新民黨葉劉淑儀更狠插佢事前未有諮詢交通事務委員會係擺委員會上枱,而引用特權法授權鐵路小組亦唔妥,程序亂晒大籠;而工聯會黃國健亦話沙中線同重大公眾安全有距離;連番發炮,唔知嘅仲以為田係民主派。
動議被否決後,田已經表示失望,但佢更不滿建制派大表歪理,直言會展站冧咗會活埋工人,點會唔算重大公眾安全?而秘書處處理佢嘅動議時都講明小組有傳召權,直指葉劉連《議事規則》係乜都唔知,認為建制派諗到乜就噏乜,做法負面。
佢更透露,事前有建制派勸佢唔好攬晒上身,試下畀其他議員揸莊,又建議考慮成員較多嘅交通事務委員會,所以佢先會臨時更改動議,由授權鐵路小組改為授權交通事務委員會,點知為大局着想竟然換來朝秦暮楚嘅指控,大嘆自己被人玩死!
田強調,今次動議結果並非重要,但偏偏建制派表現出對人不對事,道理欠奉先令佢最覺得傷心,直言連少少嘅尊重都冇埋,日後唔知點維持同建制派嘅關係。佢更話作為鐵路小組主席有心做事,但連自己人都唔撐,仲做嚟做乜喎,睇嚟佢同建制派似乎愈走愈遠。