政Whats噏：亂推稅務優惠離地　陳茂波捱轟

幾時都話識得理財係重要嘅，不過負責香港政府財政嘅財政司司長陳茂波(波叔)似乎就唔係好識得用錢喇！事關佢今日(8日)喺網誌上講起今年財政預算案中，建議提供強積金自願供款同延期年金保費稅務扣減優惠，兩者每年嘅稅務扣減額上限為3.6萬港元嘅措施，話社會反應正面，研究提高上限，仲話已經諮詢緊有關嘅持份者，睇吓要將上限加到幾多。結果就畀立法會勞工界議員何啟明炮轟，強調打工仔已經好難應付強積金額外供款，甚至唔使納稅，加大扣稅額根本唔會令基層受惠咁話！

波叔話已經着手委託保監局推出指引，協助市民識別同甄選適合自己嘅延期年金，如果市民購買符合指引嘅產品，就可以喺計算薪俸稅時享有扣稅優惠。至於強積金自願額外供款部分，都可以買延期年金，一樣會得到扣稅優惠，仲叫長者去搵代理銀行填表購買年金計劃添。

雖然波叔講得咁興奮，上調稅務扣減上限似乎勢在必行，但事實上好多打工仔根本就連強積金都唔想供，依家仲要人哋額外供多啲先有優惠，點睇都唔多市民會有興趣參與喎！究竟佢所講嘅社會反應正面係喺邊度聽返嚟？

保險界立法會議員陳健波都認為成效未必好顯著，因為僱員若要享有扣稅優惠，前提係要加入提取限制，只能於65歲退休時先可以領取款項，咁樣可能令部分人卻步。

其實波叔唔了解民情，唔清楚民間疾苦都唔係咩新鮮事，睇返今年嘅財政預算案都已經可謂千瘡百孔，淨係講派錢定唔派錢都已經搞到烏煙瘴氣，一開始講明唔會派錢，但係好多市民冇喺多個預算案措施中受惠，派錢呼聲愈嚟愈高，如果佢一開始明白市民要啲乜，就唔會搞咁多措施都無辦法對症下藥啦！

雖然最後陳茂波都死死哋氣咁補鑊，轉軚話派4000港元，不過都唔係人人有份，條件多多，計算繁複，又被鬧餐飽。今次波叔再研究上調扣稅上限，就算冇激起民怨，都有可能白做一場，幾時佢先至學精，唔好咁離地，等收集足夠嘅意見先推行同落實政策啦！