政Whats噏︰田北辰棄連任財會副主席　反薦葉劉

身兼立法會財務委員會副主席同鐵路事宜小組委員會主席嘅立法會議員田北辰(田二少)，早前因為提出要求引用《立法會(權力及特權)條例》調查沙中線醜聞，有建制派就覺陷於兩難同畀佢擺上枱，最後佢嘅動議都被否決。田二少當時已經呻覺得畀人玩死，做小組委員會主席都冇意思，今日(11日)佢就再表明唔再角逐連任財委會副主席之位，仲建議由佢前黨友、立法會議員葉劉淑儀(葉劉)接任財委會副主席咁話。

田二少被問到係咪唔再做財委會副主席，佢就話要「欠債還錢」，因為如果要人支持佢，就要跟大隊，有時跟、有時唔跟會好矛盾，「人哋」會對財委會副主席有期望，如果佢作為副主席，反對票就唔可以投太多，佢亦講唔到心入面嘅說話，主持會議時有問題亦問唔到。佢仲提到，早前有關迪士尼擴建嘅撥款，一直對該撥款有意見嘅佢就話，如果佢唔係副主席，唔會有咁多「hard feeling」喎。

至於佢唔做財委會副主席，咁邊個接任好呢﹖估唔到佢就建議之前因為佢想提特權法議案調查沙中線問題而狠插佢嘅葉劉，仲話「最硬淨嗰個，葉劉淑儀吖嘛！」真係聽到都聞到嗰陣火藥味。

葉劉就話，財委會主席陳健波(波哥)已經做咗好多嘢，做得好好，副主席只係「虛位」，佢個人就冇興趣做喇。至於波哥嘅主席之位就想培訓新人，佢自己都唔係新人，而事實上佢已經連立法會人事編制小組委員會主席都唔想做，依家都搵緊新人接佢班。不過呢啲正、副主席位都係要建制派內部商量，有共識後再選舉出嚟，唔係私相授受咁話。

而波哥喺立法會被問到接任人選時，就指住咁啱喺附近嘅金融界議員陳振英，話︰「人選咪喺度囉！」又話如果大家同意，都可以畀泛民議員出任財委會副主席喎。