政Whats噏：馮檢基退出民協　為補選鋪路？

政圈上月已盛傳，立法會前議員馮檢基(阿基)有意退出佢有份創立嘅香港民主民生協進會(民協)並另起爐灶。據聞，阿基數月前已萌生退意開始「扭計」，民協核心人物多番挽留，希望佢唔好太衝動。今日阿基作終極決定，向民協主席施德來交退黨申請，並將於明天(12日)公開對外交代。到底有咩誘因令阿基可以放棄湊咗32年嘅親生仔？

阿基自2000年起擔任立法會議員，直至2016年尋求連任失敗，令民協失去唯一的立法會議席。及後鬧出宣誓風波，6名非建制派人士被取消議員資格，其中九龍西於今年3月先進行補選一席，阿基即興高采烈表明有意參選。可惜泛民群起攻之，嫌佢老又炮轟佢「永續參選」，本來可以做「Plan B」嘅佢結果被民主派「屈基」逼退。據了解，阿基唔覺得自己老，對於社會廣泛嫌棄更加耿耿於懷。5月底已有政壇耳語指阿基考慮退出民協，佢就冇正面回應，只係推銷自己將出本書講從政多年來嘅不愉快經歷，疑似要爆政壇黑幕！

醞釀咗幾個月，阿基終於鐵下心腸決定退黨，今日會同民協一齊公布未來動向，講明將集中發展民間壓力團體。民協主席施德來確認有關消息，仲感激阿基提攜出身，相信雙方將來會有合作機會。佢又話，阿基一早已卸下黨內領導位置，僅保留中常委身份，故其退黨對民協不會造成太大影響。阿基回覆查詢時，只係話明日見，未有回應更多。

不過，有民協中人就認為阿基舉措十分可疑，認為係為參選九龍西於11月舉行另一場補選鋪路。消息續稱，阿基雖講過上次係「最後一次」參選，依家退黨就似係想脫離民主派主流意見，會唔會再戰真係得佢自己先知，更嘲諷阿基說法不合邏輯，「連自己都說服唔到」。

於政壇打滾30多年，自詡為「政壇李克勤」嘅阿基，現年65歲，經已攞咗長者卡。佢大半生投身政壇，雖然爭議多多，但係對社會確有一定貢獻。冇咗阿基嘅民協，係自此翱翔天際，還是一沉不起？大家剝住花生等睇好戲啦！