政Whats噏：錢大康氣頂虛火盛　被學生激到病？

近年浸大校政風波不斷，校方處事手法屢惹起學生不滿，校長錢大康成為部分學生追擊對象。錢校長今早(12日)出席浸大中醫活動時大爆，近兩年多咗睇中醫，每次開會後都被校內「第一名醫」直指「濕、燥、虛火盛」，而且「好㷫」兼「氣頂」，唔通意指近年被學生激出身體毛病？

香港浸會大學‒賽馬會中醫疾病預防與健康管理中心今日開幕，錢致詞時向負責浸大中醫藥發展的協理副校長卞兆祥致謝，指對方不單出心出力籌備，每次開會都關心自己健康狀況。錢坦言，自己身體有小毛病，但以前幾乎無睇過中醫，近兩年黐得卞教授多，服過幾劑中藥和保健湯水，臉色果然有好轉，「現在畀學生鬧都無咁氣頂，頭髮都開始變黑。」

錢又笑言，自己是「未病防病，已病防變」的「人辦」，呼籲市民無病都可以到浸大新開的中心，防患未然咁話。錢指，健康與藥物研發是浸大十年發展計劃的重點，利用大數據推動中醫邁向科學化、規範化，當然亦唔少得浸大校方時常提起的「國際化」。