政Whats噏:馮檢基退民協 掟煲唔掟蓋

2018年07月12日 13:08
東網電視
更多新聞短片
馮檢基宣布退出有份創立嘅民協,稱要專心搞壓力團體。

民協前主席、前立法會議員馮檢基(阿基)今日(12日)宣布退出有份創立嘅民協,走去搞壓力團體,不過呢個壓力團體仲會同民協等政黨合作,而且又會喺好多民協成員都有參與嘅民社服務中心都會繼續做主席,真係「掟煲唔掟蓋」!同民協嘅關係就咁含糊,炮轟民主派唔民主就好清楚嘞,仲點名批評批評議會陣線議員朱凱廸、民主動力前召集人鄭宇碩添!

阿基話,退出民協令佢「好唔開心、好唔想見到」,但覺得壓力團體比較聚焦民生議題,容易同政府「拗手瓜」,希望離開民協,以「壓力團體加政黨」做到「一加一大於二」嘅效果,唔知咁係咪可以形容佢同民協「藕斷絲連」嘞!

佢又話,新壓力團體共有7個人,包括佢同3個區議員,全部都冇任何黨派,未來唔會參與政治,會專心搞民生工作,不過如果成員想參選都可以,例如各區議員都可能會角逐連任,不過就唔係用壓力團體嘅名義喇。

對於外界一直關注阿基仲會唔會參加立法會九龍西補選等選舉,阿基就不置可否,只係話暫時未有考慮,過往幾個月專注寫新書同搞退出民協嘅事,冇時間諗其他嘢,包括選舉喎。

阿基又話,退黨與年初立法會補選民主派初選嘅「屈基」事件無關,不過承認當時唔係幾開心,仲炮轟「民主派唔民主」,特別點名批評朱凱廸同鄭宇碩曾公開表明唔支持佢做泛民「Plan B(後備人選)」,又多次勸退佢,強調民主係民主派嘅生命力,如果連民主派都唔民主,民主派未來又點維持落去呢?

阿基認為,一係一開始就唔好畀佢參加初選,否則冇理由唔畀佢做「Plan B」,大鬧泛民「屈基」係唔尊重機制、違反合約精神同針對佢本人。睇嚟「屈基」事件令阿基對泛民好失望,唔知會唔會影響佢對參加補選嘅決定呢?