政Whats噏:罕有立法會講英文 陳沛然冇甩轆

2018年07月12日 21:05
東網電視
更多新聞短片
陳沛然於立法會以英文向政府官員提問。(李志湧攝)

立法會議員理應具備良好語文能力,但過往就曾有立法會議員以英文發言時甩轆,畀人笑足N年。醫學界立法會議員陳沛然(Pierre)今日(12日)亦罕有地喺立法會以英文向政府官員提問,作為醫生嘅佢,英文都唔差,佢仲自爆今次用英文提問,係因為要提及好多化學名詞,唔係好識將啲化學名詞翻譯做中文,所以最終都決定用英文發言咁話。

到底問乜有咁多化學名詞呢?原來Pierre係問電子煙,質疑政府點解唔全面禁止。佢話提問時會講到唔少煙草產品中嘅有害化學成分同醫學名詞,佢通常都係用英文講,所以用英文提問會容易過用中文,亦都唔需要特別練習。不過,如果講醫療以外嘅政策事宜,佢就多數用番中文喇,用英文嘅話就可能要練下先喎。

佢又提到,知道支持同反對禁止電子煙嘅人當中都有外國人,用英文發言會比較直接,亦係尊重佢哋,而英文都係立法會官方語言之一,議員用英文提問,官員以英文回應,都係十分平常嘅事嚟啫。講真嗰句,對佢嚟講或者真係好平常,不過對部分英文麻麻嘅資深建制派議員嚟講,就未必㗎喇。