政Whats噏:象哥開會又瞓覺 張宇人直認打機

2018年07月12日 22:37
東網電視
更多新聞短片
黃定光又瞓咗。(黃仲民攝)

立法會議員以公帑出糧,開會唔留心就認真抵打啦!不過,今日(12日)立法會開會期間,記者又發現啲唔專心嘅議員,好似進出口界議員黃定光(象哥)又瞓咗,而飲食界議員張宇人(Tommy)就玩接龍,事後仲理直氣壯咁話自己邊打機邊聽緊個會喎。係咪有認真聽呢,只有佢自己先知喇!

話說今日立法會答問會,唔少議員都不停撳電話,東網記者留意到Tommy不時用電話玩接龍,事後問番佢,佢直認有玩,仲話自己有一路聽緊個會,玩得就唔怕被人影咁話。

至於成日畀人影到喺開會期間瞓覺嘅象哥就疑似再搵周公,不過今次「進化」咗,一邊閉目,一邊會郁吓手指、擰吓個頭、做埋頸部運動添!唔通夢遊?象哥事後解釋,睇世界盃英格蘭大戰克羅地亞,搞到有啲頸梗膊痛,所以做吓運動鬆吓咁。佢仲大讚克羅地亞無欺場,跑足百二分鐘,好佩服佢地嘅拚搏精神。

講起睇波,作為英格蘭擁躉嘅立法會議員張國鈞(Horace),佢話雖然英格蘭入唔到決賽,但入到四強已經當贏咗,佢決賽會撐克羅地亞,事關喺南斯拉夫未分裂前,有「歐洲巴西」嘅美譽,而決賽當日撞正朋友生日,到時將會喺餐廳一邊慶祝一邊睇波咁話。

Horace仲話,未做議員前,會飛去英國睇波撐愛隊車路士。英超下個月先開鑼,加上區議會同立法會嘅換屆選舉都並非今年舉行,佢話會考慮下係咪撲飛睇波喎。