政Whats噏:勞工二代拒商界甜頭?林健鋒食檸檬

2018年07月12日 23:12
東網電視
更多新聞短片
郭偉強兒子(左)見到林健鋒(右)好避忌。(溫國佳攝)

勞工界同商界喺取消強積金對沖、最低工資、標準工時等多個勞工議題上,一直都有好多爭拗,唔知係咪有其父必有其子,工聯會立法會議員郭偉強嘅仔仔骨子裏都流住勞工嘅血,見到商界議員林健鋒(Jeffrey),都怕怕醜醜好避忌,連Jeffrey請食零食都唔敢接。唔通佢咁細個就識拒絕商界嘅甜頭?

話說郭偉強今日(12日)帶咗阿仔去立法會會議廳外,阿仔相當識做,工聯會麥美娟同保險界陳健波話要抱,佢都來者不拒,仲同佢哋係咁傾計添,成個親善大使咁。

不過,當Jeffrey拎咗啲零食出嚟諗住請佢食,阿仔就企到遠一遠,唔敢行埋去拎。郭偉強就話平時喺屋企食薯片,阿仔就會搶薯片食㗎。於是,Jeffery就將啲零食畀咗郭偉強,果然阿仔就即刻衝埋去老竇度拎喇。

勞資雙方一向都好多爭議,唔知郭偉強係咪自細開始教阿仔,唔好貪圖商界嘅便宜呢?定純粹係因為阿仔見到Jeffrey特別怕醜呢?