政Whats噏:立會壓軸音樂會 盧偉國老貓燒鬚

2018年07月13日 18:06
東網電視
更多新聞短片
盧偉國今日表演色士風。(溫國佳攝)

立法會不時舉辦午間音樂會,而今個立法年度已到尾聲,今午(13日)亦上演壓軸表演,有多位議員大開金口,不過,精通中西樂器嘅議員盧偉國今次就老貓燒鬚,搞到立法會秘書長陳維安都受佢影響,齊齊入錯Beat!

盧今日又表演擅長嘅色士風,同青年音樂訓練基金一齊合奏,之後再同陳維安以及議員陳淑莊、范國威合唱《萬水千山縱橫》,點知滿身音樂細胞嘅佢竟然入早咗,唔知仲以為佢率先獨唱添,之後又到陳維安入早咗喇。

盧事後就話,每首歌處理方法都唔同,數錯拍子就好易入錯咁話,而陳維安都笑晒口,話解釋唔到點解會入錯咗,不過似乎就唔係受盧感染,因為佢太投入都無留意盧唱早咗囉,而佢除咗跟大隊去天水圍練習一次外,自己都有再下苦功練唱歌喇。

立法會主席梁君彥都有在場欣賞,佢就話參加音樂會嘅議員,比平日議事堂入面嘅議員數目仲多喎,似乎話中有話。不過,佢就以玩樂器比喻,話中西樂好似唔啱Key,但最終都夾到樂曲,希望議員都可以放低爭拗,明年合作可以有所改善。