政Whats噏:睫毛過長刮損眼 祥哥憂要拔毛

20180716
東網電視
更多新聞短片
祥哥驗眼時被指下眼睫毛過長刮損眼球。(郭詠欣攝)
「小酒窩長睫毛迷人的無可救藥」正所謂歌都有得唱,有長睫毛十分迷人,不過有時都會整傷眼!立法會議員梁志祥(祥哥)今日(16日)出席傳媒茶敍時,話要向政府施壓大推普及驗眼,佢仲親身上陣畀專業視光師驗眼,點知一驗就發現佢眼睫毛過長,整損咗眼球!嚇到祥哥即刻問係咪要拔毛防損,聽見都覺得痛啊。
驗眼分為3部分,首先遠距離單眼讀數字,睇吓視力如何,祥哥一坐低氣勢如虹咁讀晒出嚟。第二部分要驗有冇眼乾,視光師話祥哥有小小眼乾,而且左眼下眼睫毛過長刮損咗眼球,不過滴番眼藥水就得,唔使擔心,最後驗眼壓就幾正常。祥哥聽到之後都話,好彩小小事,無咁擔心。
另外,民建聯喺暑假展開「Check一Check,健康D」社區健康計劃,會在18區推動驗眼、驗耳同骨質檢測的活動。立法會議員陳恒鑌就擔任護眼大使,今日仲同祥哥一齊體驗青光眼同黃斑病變,大玩拋波,最後祥哥以10分之差勝出比賽,兩人玩完都大叫「真係好難睇嘢啊」。