政Whats噏:立會七國咁亂 吳文華呻秘書長唔易做

20180716
東網電視
更多新聞短片
吳文華大嘆很少人願意出任秘書長,陳維安咪好難交棒?(設計圖片)
立法會近年「武打片」屢見不鮮,議員衝到主席台前已經唔算太特別,衝擊會議室,甚至撞爛立法會大樓嘅玻璃門,真係乜都有,就連財務委員會主席陳健波都曾經笑指,開會要叫定救護車喺附近。立法會前秘書長吳文華(Pauline)今日(16日)出席前立會議員劉慧卿(卿姐)的節目時提到,立法會環境令到好多人好驚,依家好少人願意出任秘書長喎!
Pauline原本講起秘書處嘅傳承好重要,應該要珍惜經驗較深的同事。被問到係咪不應再公開招聘秘書長一職,Pauline就話自己退休時,有公開招聘秘書長,秘書處內部人士都可以申請,當時由行管會轄下嘅遴選委員會決定揀邊個。但係傳媒不時報道立法會嘅激烈場面,令到好少人肯做秘書長,因為呢啲人原本喺外面機構擔任較高職位,會擔心係咪日日都要面對呢啲激烈場面,因而卻步。如果係立法會秘書處出身,就會明白呢啲場面只係工作環境嘅一部分,平時環境都好好,份工亦好有意思。照咁講,現任秘書長陳維安咪好難交棒?
立法會議事規則委員會正研究修改議事規則,若議員多次被逐離場,或有機會整個年度都被禁止出席會議。Pauline認為,若有議員經常阻礙議會順暢履行職能,應該要有應對措施,罰則要有阻嚇作用,令議員明白刻意「搞嘢」會有後果。但參考外國議會做法時,亦要考慮香港獨特環境,例如香港每周只有一次大會,有些國家嘅議會就係每日開會,若不准開會3次,只涉及3日,若應用於香港即有3星期不能開會,所以要慎重行事。Pauline又話,外國議會的確有規定,若議員嚴重影響會議,或需要整個會期被禁止開會,但必須獲多數議員同意。
卿姐就質疑認為,凍結議員出席一、兩個月嘅會議都係大事,即使期間有關議員仍獲出糧,但議員由選民選出,點可以無端端被禁開會幾個月?
講開秘書處,近日部分2000年6月前入職嘅立法會秘書處員工,要求與此日期後入職嘅員工一樣可延長退休至65歲,Pauline話,行管會曾通過喺不阻礙其他員工晉升下,屆滿60歲嘅員工可選擇延至62歲才退休,依家最少可以沿用呢個做法嘅。