政Whats噏：爆屈基內幕　馮檢基斥朱凱廸講大話

今年初立法會四席補選提名期開始前，泛民進行初選，發生「屈基(迫退馮檢基)」事件。馮檢基(阿基)今日(17日)就其新書舉行發布會，大爆「屈基」內幕，指斥議會陣線議員朱凱廸「不斷講大話，明明暗策劃搞Plan B，但是敢做不敢認，賴得就賴」，令阿基耿耿於懷。

新書詳細列出初選期間各人對話及周旋過程，問到係咪持有錄音，阿基未有正面回應，只係話「親眼、親耳及親身所知的事，係事實」。書中引述朱凱廸多番明言，阿基出戰無勝算「初選姚松炎贏你咁多，你咁少票，你贏唔到啦」，朱又稱「你(阿基)打中場，我哋要前鋒」。書中更披露，民主派曾召開會議討論「Plan B」，阿基認為眾人背着他開會，佢被排斥在外，唔接受眾人擬定的「Plan B」名單，對此消息感到如五雷轟頂。

另外，阿基又在書中指自己多次讓位畀後生仔上位，卻以「自己才63歲，對政治人來說，正是當打之年」為該章節結尾。被問到是否指會考慮參加補選，佢就話「現在不考慮」，而2019年及2020年的區議會及立法會換屆選舉會否考慮，佢則稱「到時先算」。