政Whats噏：劉業強能力成疑　張學明：唔會拉佢落嚟

新界鄉議局主席劉業強成功全面接班其父、「新界王」劉皇發嘅政治職位。不過自佢上場以來，鄉議局就一直盛傳分裂為兩大陣營，但劉業強喺今日(17日)嘅鄉議局執委會上就自動粉碎呢個謠傳，但有人公開重提質疑佢能力喎，到底係咪真正和解呢？

劉業強子承父業，喺無競爭下當選鄉議局主席，其後亦自動當選立法會鄉議局功能界別議員，喺上年更獲政府委任行政會議非官守成員。劉業強雖然看似無風無浪下全面接棒，但鄉議局副主席張學明勢力亦都不容忽視，好似一年半前嘅特首選委選舉，張學明派系當選人數明顯佔多，先贏一場鄉議局內鬥，所以一直有指鄉議局分開兩大陣營，以劉業強同張學明為首對碰。

但喺今日嘅執委會會議開始冇耐，劉業強就煞有介事話出任主席以來，外界有好多流言蜚語，指鄉議局內部分成太子幫同學明黨兩派，兩派之間一直明爭暗鬥，所以就覺得要講清講楚喎。佢強調鄉議局中只得鄉事派，因為個個都係自己人，而未來新界仲有好多場硬仗要上下齊心去應對，相信其餘兩位副主席都認同要團結，全心全意為新界人打拚喇！

劉業強公開否認不和傳聞，仲叫在場人士一齊畀掌聲張學明，而張學明就反客為主，企起身同劉業強握手，而劉業強亦都邀請一直坐隔離默不作聲嘅副主席林偉強，三位正副主席齊齊喺台上握手，做騷意圖相當明顯。

張學明之後亦有所回應，強調劉業強上任以來，自己都係義無反顧、一如以往全力支持佢嘅主席工作，更話過去聽到背後唔少是是非非，但佢都會抹咗去就算數喎。佢更明言，有人質疑劉業強能力同投入程度，重申自己話過就算劉業強唔得都唔會將劉拉落嚟，而係更積極幫佢做好，希望劉業強有朝一日可以真正擔當大任。而經過幾年後，佢就認為劉業強喺某程度上都可以獨當一面，更話鄉議局係大家庭咁話。

張學明表面讚劉業強表現，但實情係借機會公然數劉業強能力不足欠投入，睇嚟鄉議局都係繼續表面團結。而今次呢場大龍鳳，張學明更凸顯咗佢喺鄉議局嘅地位，同埋佢扶助主席嘅角色，薑真係愈老愈辣！