政Whats噏︰憶推中醫註冊　梁智鴻嘆兩面不是人

為減輕公營醫療體系壓力，政府推行自願醫保計劃，外界對此有唔同意見。曾任醫院管理局主席嘅梁智鴻(金刀梁)今日(21日)就話，過去自己熱衷於推動社會改變，不過就要面對唔少困難，譬如講咗好耐嘅醫療改革咁。佢仲提起當年推動中醫註冊制度時飽受中醫同西醫批評，覺得自己「兩面不是人」喎。

金刀梁最近出書回顧過往工作，今日佢宣傳新書時就提到過往想推動社會改變都面對唔少困難。佢又以推動中醫註冊制度為例，當時中醫認為註冊制度變相令佢哋畀西醫操控，而西醫又擔心會令醫療人手驟增，利益會受損，結果不論中醫定西醫都鬧佢，到佢參與有關標準工時嘅討論，都係明知道山有虎，仍要向虎山行。

佢又話自己喺唔同崗位目擊社會轉變，但亦見到好多人唔願意去轉變，因為擔心自己利益受影響，所以要推動轉變係好困難，但佢認為依家香港人自己當家作主，當一件事係有需要時，就應該以理性去推動香港發展喇。