母子墮樓：產後抑鬱普遍　十個媽媽一個中　

油塘今午(24日)發生倫常慘劇，疑患有產後抑鬱的婦人與18個月大的兒子同墮樓，令人惋惜之餘，亦喚起大眾對產後抑鬱的關注。香港中文大學醫學院精神科學系教授李誠指，產後抑鬱屬於抑鬱症其中一種，可分為輕、中及重三個級別，有10%女性產後會患上不同程度的產後抑鬱。若婦女本身是抑鬱症患者，或是產前承受環境、經濟及家庭壓力，患產後抑鬱機會比一般人高。

產後抑鬱最特別的徵狀，是顯著增加傷害或結束小朋友生命的機會，李解釋：「通常會出現喺嚴重患者身上，佢哋（患者）覺得睇唔到將來有希望，對自己失去信心，覺得自己喺世界上係一個負擔，覺得無能力湊大個小朋友，喺佢哋主觀世界，依家結束小朋友生命係唯一可行之路，佢哋唔覺得係一種傷害，而係小朋友嘅一條出路，佢哋通常傷害完小朋友就會自我結束」。

另外，嚴重患者亦可能出現近似思覺失調的徵狀，出現幻聽幻覺，例如聽到有聲音批評自己「你有咩用呀，累咗個細路啫，你不如搞掂佢啦」，患者信以為真，會危害小朋友性命。其他病徵則與一般抑鬱症一樣，會出現情緒低落、自我埋怨、胃口差、難集中精神、記性差及體重下降等。

李指，婦女在港生育後要填問卷，以識別有否相關徵狀，若出現較多徵狀，會轉介再作評估，惟若相隔一段時間才發病則難以識別，要靠家人、朋友或家庭醫生留意。家人若發現婦女出現持續嚴重失眠、基本生活能力轉差、出現顯著自責心態，例如見到子女都不快樂，則要盡早帶她求醫。

李續稱，此類病人屬高危一族，若持轉介信到公立醫院求醫，只需輪候一至兩星期，輕度及中度患者只需要作心理治療或家庭干預，嚴重者則要藥物治療。他強調，產後抑鬱並非不治之病，呼籲患者要正視問題，及早求醫。