政Whats噏：民協逾半選區被改劃　隨時滅黨

選舉管理委員會尋日(23日)公布區議會選舉分界及名稱臨時建議，全港逾百選區需要重劃，多名區議員炮轟政府「亂嚟」，做法匪夷所思，更有雙料議員話考慮跟「票倉」轉區喎。然而喺深水埗有7名區議員嘅民協，有逾半議席受到影響，連黨主席施德來喺黃大仙區亦受波及。深水埗區議員兼民協中常委譚國僑質疑政府今次劃界係「衝着民協而來」，批評政府「喺地區落水」，企圖透過劃界左右選舉。繼黨元老馮檢基退黨後，民協又遇到劃界咁大變動，若果失多幾個議席隨時滅黨呀！

民協多名議員都受到影響，包括南山、大坑東同大坑西選區嘅譚國僑、南昌西選區嘅衞煥南、李鄭屋選區嘅江貴生、荔枝角南嘅楊彧。譚國僑坦言，由於新選區住戶嘅政治取向等難以預計，只能與建制派「鬥做」，並冇把握。民協策略會先「穩住現任先」，望盡力保留現有議席。

至於已由民協轉投民主黨嘅深水埗幸福選區區議員鄒穎恒料將其議席「交出」，或轉戰新選區。民協中人話已打算派出新人「接手」幸福選區，惟今次劃界令當區民協原有支持者被「劃走」，料對新人選情會有影響。

港島方面，銅鑼灣選區嘅伍婉婷被劃走區內五座大廈，但要接收「傘兵」楊雪盈嘅大坑區一條街，伍認為今次有可能是史上最奇怪嘅改劃選區分界，唔明點解選管會要大費周章，左割一塊、右硬塞一條街，影響3個小社區的完整性。而離島區議會長洲兩個議席更罕有地合併，以騰出一個議席畀東涌加新區，長洲南區議員鄺官穩鬧爆選管會唔用腦，機械式咁劃區，「好難相信當中不涉政治考慮」。

此外，以新界東為基地嘅新民主同盟有4個議席受到影響，據知該黨已召開緊急會議，討論各現任區議員係咪要跟「票倉」走轉選區，甚至交畀新人接手舊區等可能性，新同盟唯一「雙料議員」范國威更有可能為新劃界轉區，但黨內仍未有共識要點應對。

每逢換屆選舉，選管會都會因應人口改劃選區，年年都被鬧爆，斥責唔理區情亂咁劃，而選管會就只會陳腔濫調話人口問題，激嬲唔少區議員。不過齋睇民協嘅情況，黨元老馮檢基早排退黨另起爐灶，今次又過半區議員選區被改劃，可謂屋漏兼逢連夜雨，到底明年換屆後會滅黨，還是由新生代扭轉局勢重整旗鼓呢？