政Whats噏：放假先嚟打風？　天文台拆解力場之謎

想放「風假」難過登天？每年到咗打風季節，打工仔都希望打風撞正返工時間，咁就可以享受一天「風假」，輕輕鬆鬆留喺屋企攤抖吓。不過，呢個願望成日落空，莫非真係有咩「力場」同打工仔過唔去？天文台最新一集「氣象冷知識」就請來浸會大學體育學系副教授雷雄德，聯同天氣先生沈志泰為大家分析一下。

一個自稱「阿誠」嘅聽眾致電節目，解釋香港過去多次都喺市民收工或放假先發出8號烈風或暴風信號，背後原因原來係同香港人嘅工作時數有關，唔講唔知，港人一星期工作45至50小時，其餘時間用嚟搭車、食飯、睡覺，加埋公眾假期，有70%時間係唔使返工，所以喺非上班時間掛風球嘅機會亦較高。

沈志泰解釋，如果真係要話有咩「力場」發功，嗰個「力場」就係副熱帶高壓脊，副熱帶高壓脊嘅強弱同位置，的確會影響颱風走向。佢話，副熱帶高壓脊係氣流下沉嘅高壓，會帶來高溫晴朗天氣，最接近香港嘅太平洋高壓脊，就成日喺打風季節同颱風角力，當副熱帶高壓脊增強、減弱或移動時，颱風就會受其引導嘅氣流影響而改變路線。