政Whats噏︰容海恩雙喜臨門　出嫁首名姊妹曝光

新民黨立法會議員容海恩(Eunice)與該黨政策總裁袁彌昌將於下月結婚，可靠消息指Eunice已懷孕，可謂好事成雙。究竟Eunice會搵邊個做姊妹，陪佢出嫁？原來就係曾經話過Eunice拍拖會幫手做掩護、出嫁要做姊妹嘅工聯會立法會議員麥美娟(Alice)喇。不過Alice就唔肯透露Eunice嘅大日子，話要留番Eunice公布喎。

Alice話成日出席活動時都見到Eunice，仲笑Eunice會唔會冇時間拍拖，估唔到咁快就出嫁。問到知唔知Eunice係「好事成雙」，Alice就笑笑口話佢只知道係好事。新民黨主席葉劉淑儀早前話該黨桃花旺盛，仲邀請單身嘅Alice加盟，Alice就話工聯會都撮合好多情侶，相信「唔關黨事關人事」喎。

至於去年8月曾同過Eunice、袁彌昌一齊食飯嘅工聯會前立法會議員鄧家彪(阿彪)就話，當時食飯已覺得佢哋眉來眼去。上年年尾有日約咗Eunice晨咁早去水泉澳傾地區問題，袁竟然都有現身，就覺得佢哋已係「超越同事嘅關係」。佢又話知道袁作為才子喺大學好受歡迎，望袁婚後「穩定啲」，專心寫多啲好文章。

Eunice作為首位任內結婚女議員，覺唔覺得佢婚後可能會專注照顧家庭，未必角逐連任呢？阿彪就話，相信Eunice可以家庭事業兩得意，在職婦女最重要都係有支持自己嘅伴侶咁話。