你要知:吹頭去油洗頭有講究!拆解7大護髮謬誤

2018年08月10日 06:00
東網電視
更多新聞短片
以為自然乾比用風筒吹髮好?原來未必!

髮型影響一切,頭髮毛躁乾旱的話甚或會破壞一身造型,太油膩又會令人尷尬萬分。坊間有不少去油或去毛躁的偏方,包括「洗少啲頭就出少啲油」、「自然乾冇咁傷頭髮」等。到底是否屬實?皮膚專科醫生陳厚毅將為大家逐一拆解7大護髮疑團。

洗少啲頭髮,頭髮靚啲順滑啲?

其實洗髮次數與髮質好壞關係不大,反而對頭皮的影響較大。若然所選用的洗頭水鹼性偏高,容易令頭皮保護膜受損。陳厚毅解釋,洗髮次數過多,亦有機會刺激頭皮,以致出現「頭皮濕疹」。另外,用過熱的水洗頭,也會令頭皮變得敏感及頭痕。至於有指洗得頭多會甩多頭髮,陳就指這是坊間誤解。因每一次洗頭都會掉少少頭髮,但不會因洗頭次數多寡而「甩多啲」。

頭髮油淋淋點算?洗得愈多出油愈多?

頭油多少關乎髮根問題,飲食、天氣熱都會令髮根出較多油,但就與是否洗得多頭無關。有較多頭油問題的人,應每天洗一次頭髮,有助控油外,亦可避免分泌的油脂阻塞毛孔,導致毛囊炎。一般毛囊炎患處會摸到「一粒粒」,最初未必痕亦未必痛,但後來或會出現紅、腫、痛及發熱。陳警告,萬一處理不妥,「有機會令毛囊疤痕增生,從而令嗰個位置唔再生頭髮。」另外,經常進食油膩或辛辣食物都有機會令油脂分泌旺盛,故此「可戒則戒。」

燙染後髮質一定會變差?

燙染對頭髮結構上會有一定的影響,頭髮壽命會減少,生得慢,亦會比較脆弱。另一方面,頭皮碰到染髮劑等化學物料易受刺激,應避免塗抹在頭皮上。「次數唔使多,幾個月一次,唔好成日轉顏色,畀啲時間頭髮康復。」若發現頭髮負荷不到,應讓它有充足的「休息」,不宜再進行任何燙染程序,也沒有所謂的極速修復方法,選用適合的洗頭水及護髮素已有助頭髮自我修復。

洗頭水要常換,以免頭髮「習慣」?

「啱一半!」洗頭水的確要經常更換,但並非「習慣」,而是「天氣轉變」。雖然香港的四季差異不大,但髮質仍會隨天氣變化變得較油或較濕。因此,大家可按天氣變化,改用較控油或較滋潤的洗髮產品。

多用護髮素、髮尾油?

護髮素、髮尾油對頭髮有滋潤作用,亦有醫學文獻指有機會減少脫髮,不過要留意自己對產品會否過敏。一般來說,只要按樽身指示使用,便可令頭髮變得滋潤及「硬淨」。陳又特別提醒,用護髮素、髮尾油時應避免接觸頭皮部分,以免阻塞頭皮毛孔。

游水後頭髮變得乾旱毛躁點算?

無論海水或泳池的氯氣,都會「抽乾」頭髮,因此游泳後必須清潔乾淨,洗走海水或化學物質,「但係又唔使消毒咁誇張」。陳建議,可用適量的護髮素滋潤頭髮,「如果真係覺得游完之後頭髮極度旱、極度差嘅話,可能就要減啲游水次數,或者戴泳帽。」

洗髮後,自然風乾較風筒吹乾冇咁傷?

錯錯錯!自然風乾反而會令頭髮更乾旱!陳解釋,有研究發現,自然風乾會令頭髮水份蒸發,令頭髮乾旱。同時,頭髮愈潮濕,毛囊外層會處於擴張狀態,「較易傷到頭皮」。因此,他建議無論頭髮長短,洗髮後應盡快吹乾。不過,用過熱強風吹髮也會傷及髮質,因此不應定點吹一個位置過久,「可以打轉,或者覺得太熱嘅話,轉用凍風降一降溫!」

-------------------------

《骰寶坊》誠邀各地【賭王】【賭后】挑戰神人境界,每日更有百萬籌碼等你領取!

立即免費下載,體驗《骰寶坊》最真實、刺激的多人在線骰寶遊戲!

遊戲下載:https://goo.gl/j16mcF