政Whats噏:橄欖舊議辦曾被爆格 丟空多年無人吼

2018年08月10日 22:27
東網電視
更多新聞短片
無議員承租橄欖交出嘅議辦,唔通因為嗰個議辦風水特別差?(設計圖片)

有議員搵地區辦事處(議辦)好艱難,但有啲屋邨議辦丟空幾年都冇人要。話說前立法會議員陳鑑林(橄欖)喺2016年換屆退下火線後,就交出其位於油塘邨嘅議辦,房屋署喺今年4月先至重新放租,當時有立法會議員話有興趣租,點知事隔幾個月,房屋署今個月又再招租。唔通真係因為橄欖在位時,議辦曾被爆格,風水特別差,搞到無議員夠膽承租入主?

立法會議員胡志偉係現任九龍東5位議員當中,唯一一個對呢個議辦有興趣,但有傳佢抽中籤都唔肯要。不過,佢否認中籤,堅持話係同房屋署傾唔掂數,因議辦月租高達近9000港元,所以曾經「還價」話想租一半,房屋署又唔肯,唔啱使就唔要喎。

至於柯創盛(柯仔)接棒橄欖議席後,點解唔接手埋個議辦呢?柯仔就好似「三姑六婆」上身咁話:「死囉,做乜鬼冇人要,係咪風水唔好?」又話喺觀塘區內已經有辦事處,唔打算承租嘞。佢仲慨嘆話,上任至今無法喺黃大仙區內嘅公共屋邨搵到位「落腳」,最近抽順天邨一個新辦事處又唔中籤,直言唔好以為做咗房屋委員會委員就有着數,實情房屋署都幫唔到佢。

有傳下屆有意落戶九龍東嘅勞工界議員陸頌雄,難得九龍東有位無人吼,會唔會考慮入主?佢就話九龍東有黨友黃國健(KK)同另一勞工界議員何啟明,唔會考慮落腳喎,仲建議不如問吓何啟明租唔租,可能何會有興趣。

坊間一直盛傳KK會放棄競逐連任,由何啟明接棒,但兩人喺油塘邨早已有聯合議辦,問到會唔會拆夥?何大笑話:「玩嘢咩」,解釋油塘邨只有四幢大廈,每座都有一個議辦,搞到丟空嘅議辦猶如雞肋,食之無味棄之可惜,但佢就唔會無端端同KK分家。何又話,油塘邨啲街坊好可愛,每逢大時大節議辦有嘢派時,就會聯群結隊出動,個個議辦都攞齊。

世界就係咁奇怪,有啲區議員出盡力都搵唔到議辦落腳,偏偏就會有議辦無人要。房屋署規劃時根本無考慮吓現實情況,搞到市民一係被議員包圍,一係就想搵個人睇吓都無,而橄欖早已人去樓空,既然個議辦冇人要,不如攞出嚟做其他用途好過啦!