政Whats噏:李柱銘撐陳浩天「講獨」無違法

2018年08月11日 23:24
東網電視
更多新聞短片
李柱銘力撐港台直播陳浩天演講。

外國記者協會周二邀請主張港獨嘅香港民族黨召集人陳浩天出席午餐會演講,有指廣播處長梁家榮曾指示港台當日唔可以直播或轉播有關演講,因為唔可以提供平台宣揚港獨,只可以喺剪輯後播出。有「李漢奸」之稱嘅民主黨創黨主席李柱銘今日(11日)就話,呢件事嘅關鍵在於直播係咪違法,質疑若唔違法,點解唔可以做喎。李漢奸咁講法,係咪代表佢支持宣揚港獨呢?

早前有英國解密檔案踢爆,回歸前有一名香港政界重量級人物曾指出,李漢奸基於中國可能出現嘅轉變,可能會諗港獨係一個選項。而被解密檔案踢爆後,李否認有關講法,話自己從來都唔認為港獨係一個選項。不過,今日佢出席活動時,被問到港台禁止直播陳浩天演講一事,佢就話任何市民只要唔違法,就唔可以禁止佢做相關事情,如果講港獨已違法,大可以採取法律行動,而非強迫協會唔准邀請陳演講。

李曾經被質疑認為港獨係其中一個選項,雖然事後佢否認,但今日佢力撐港台直播陳浩天演講宣獨,又認為不應該逼外國記協唔准邀請陳演講,如果再有指摘佢係撐港獨,咁就真係唔好怨人,只怪自己攞嚟衰。