政Whats噏:中風年輕化 工聯會小花都中招

2018年08月12日 13:11
東網電視
更多新聞短片
黃思鴻(左1)指自己高中嘅時候都中過風,半邊臉癱咗郁唔到。(徐家浩攝)

工聯會立法會議員麥美娟(Alice)非常關注健康議題,今日(12日)就搞咗場「工聯會新界西心房顫動民間篩查大行動」,喺青衣幫啲長者檢查有冇心房顫動,以預防中風。以前喺工聯會做暑期實習嘅兩朵小花,現為工聯會社區幹事黃思鴻、陳安妮都有出席,其中黃話健康真係好重要,事關佢自己18歲仲讀緊高中嘅時候都中過風,雖然唔係嚴重嗰種,但當時半邊臉癱咗郁唔到,諗番都覺得驚啊!

她中風後先睇西醫做物理治療,後改為睇中醫,前前後後都醫咗成半個月,黃話中風嘅時候天氣比較凍,中醫就話佢冇好好保護臉部肌肉,導致「邪風入體」,所以自此大風嘅話都要戴口罩,同埋定期做身體檢查。

陳雖然冇類似嘅經歷,但佢同黃一齊服務緊嘅大窩口區都比較多長者,所以健康議題都要跟得貼,每個星期會幫長者量血壓,同埋搞吓康體太極班等,而佢自己都會每個星期跑步,不過就冇同黃一齊跑喇,事關黃話鍾意競走多啲,所以都係各有各做運動。

Alice話中風有年輕化趨勢,試過同一個年輕朋友用WhatsApp傾偈,傾到一半對方冇覆,起初無為意,後尾先知原來佢中咗風。所以Alice都好注重健康,有節制飲食,試過有一次食過龍,就決定由西環行返金鐘立法會攞車,足足行咗40分鐘,實行幫助下消化咁話!