政Whats噏:工記中佬臨危機 睇戲學逆流而上

2018年08月12日 16:12
東網電視
更多新聞短片
工記中佬鄧家彪何啟明陸頌雄步入中年,要迎接人生一道又一道嘅逆流。(設計圖片)

未來兩年都係選舉年,各黨各派都出招爭位,而工聯會(工記)雖「穩袋」兩個勞工界功能界別議席,但由「旋轉門」出嚟嘅人都要謀定後路。工記鄧家彪(Bill)上屆「旋轉」出來兩戰新界東都失敗,而現任勞工界議員陸頌雄同何啟明,下屆更可能兩個只能活一個。三位已踏入中年嘅男人,到底會點面對目前危機?

Bill今日特意拉埋陸、何二人同黨友麥美娟一齊去戲院,睇一齣套近來爆紅嘅電影,內容講述幾個「高不成、低不就」嘅中年男人,加入龍舟隊後,竟重拾久違了的衝勁,重新燃起鬥志,迎接人生一道又一道嘅逆流。

以前有划艇嘅Bill慨嘆話,扒龍舟同划艇雖有不同,但一樣着重團隊精神、節奏同毅力,直言坐得上去,只可以認清鼓聲,破浪前行,而套戲唔止勵志,更講述人到中年瓶頸,縱會失勢,碰上關口,都要勇敢同認真活一場。現年38歲嘅佢,上屆與黨友郭偉強齊任勞工界議員,郭轉戰港島直選成功,佢則未能再躋身議事堂,且盛傳下屆區議會要轉區,到底新一場選戰是危還是機?

至於現年39歲的陸頌雄同33歲的何啟明,兩人都是如日中天的年紀,下屆則要迎接直選洗禮。有指黨內老將黃國健做埋今屆就退休,九龍東一席就成為兩人嘅「救命草」,但何啟明本身是觀塘區議員,較任元朗區議員的陸頌雄有更大優勢,只要九東「兄弟」支持,何順利接棒機會較高。

而一直有聲音欲推舉麥美娟轉戰俗稱「超級區議會」(超區)的區議會第二功能界別,咁新西一席就可以讓畀黨友。可惜,工記元老王國興都未能「戰勝」超區,麥美娟又係咪更有勝算呢?結果不言而喻,照咁講,陸頌雄就更加難再於新西插旗。

孔夫子開講有話「三十而立,四十而不惑」,人到30歲就開始訂立人生目標,活到40歲就唔會再感到困惑。唔知上述幾位「中佬議員」睇完戲會否悟出真理,解決人生困惑,準備明後兩年逆流而上呢?