政Whats噏：畀面楊偉雄去飯局　查毅超撇甩老婆

香港科技園公司董事局新主席查毅超(Sunny)上任一個半月，今日(15日)首次由公司管理團隊陪同下與傳媒見面。Sunny更自爆，為咗出席創新及科技局局長楊偉雄邀請嘅活動飯局，決定「賣甩」老婆喺屋企，仲戲稱：「可想而知我同局長關係幾好喇！」

活動甫開始Sunny就推銷科技園嘅未來發展，又話園內部分設施已經用咗好耐，會做翻新工程變得更現代化，更會同「產學研」多溝通同合作，幫助科技園發展。Sunny更笑稱，上任後多咗好多白頭髮，可能係年紀問題，亦可能係多咗嘢做。佢幾日前亦向園區公司廣發「英雄貼」約眾人見面，至今已收到過百個回覆，下一步佢亦希望可以單獨見晒所有公司同事聽意見，豪言「我落得嘅單就一定會做」。

至於同楊偉雄關係又如何？Sunny爽快稱：「都唔錯㗎」，仲話尋日朝早出門口，老婆好凌厲咁問「你今個星期又唔返嚟食飯啊？」佢即刻耍手又擰頭，答應聽晚一齊食飯。到了下午開緊董事局會議時，有一個不知名電話不停打嚟，最後先知係楊偉雄助理，邀請佢周五(17日)去科技大學出席一個活動，兼且聽晚要先同活動出席者食飯。

佢最後硬住頭皮答應，仲反問記者，如果唔係關係好，又點會一齊食飯呢？Sunny嘅同事即在旁戲謔：「即係佢為咗局長可以放棄老婆啊」，Sunny大笑後否認，強調自己唔會咁樣對老婆喎。而科技園公司亦澄清，話當晚飯局楊偉雄無份，Sunny係單拖應邀出席。