平日健唔健康、有冇做運動，真係身體最誠實。九龍社團聯會嘅健康大使、食物及衞生局前政治助理陳凱欣，今日(18日)出席全城跑步活動，點知做熱身時，連向後踢腳都要望人先識做，只係短短約5分鐘熱身，佢扯蝦扯成幾分鐘，聲稱係因為好熱喎。

陳唔止郁兩下就喘氣，跑步都仲要化濃妝，眼睫毛長到好似黐上去咁，但佢強調「唔係黐㗎，捽唔甩㗎，亦都冇眼影嘅」，稱做運動係專注用個心去做運動喎。

陳同建制派今搞「大龍鳳」派發健康小冊子，之後就有網民影到裝小冊子嘅紙箱被棄置喺黃大仙街上，批評有人隨處拋棄垃圾。唔知陳做完健康大使後，係咪應該做埋清潔大使，清理番啲垃圾呢？