政Whats噏：工記舔到盡　掛雙牌頭出選惹不滿

工聯會(工記)自6年前同民建聯(民記)「分家」後，工記喺大小選舉都只掛上自家牌頭參選，但明年底舉行嘅區議會換屆選舉，或會出現「分久必合」局面。建制地區消息流傳，多名積極考慮參加區選嘅工記地區人士，意欲申請使用民記牌頭，實行以「雙牌頭」搶票。有民記中人不滿現時「雙牌頭」嘅區議員喺選戰中「舔盡」兩邊選票，到立法會選舉就分家變番工記樁腳。工記立法會議員黃國健(KK)就講到明：「最重要係贏到(議席)」。

工記喺2012年嘅立法會選舉同民記分家，自組名單出戰，而喺2011年嘅區選亦已見分家迹象，好似時任元朗區議員陸頌雄當屆就搣甩民記牌頭，單獨用工記牌頭參選至今。自分家後，立法會再冇「雙牌頭」議員；區議會方面，亦只剩下黃大仙區議員譚美普同深水埗區議員陳穎欣，以及早前喺東區區議會佳曉選區補選勝出嘅植潔鈴仍然沿用「雙牌頭」。

由於工記同民記票源相近，分家後一直存在互相?票問題，因此喺今年3月立法會4席補選中，代表建制派出戰新界東補選嘅工記鄧家彪就再一次掛上「雙牌頭」，成為之後民記植潔鈴套上工記牌頭出戰補選嘅契機。隨着明年區選逼近，地區流傳唔少工記內積極考慮參選嘅人士，都希望喺選戰中以「雙牌頭」出戰，佢哋多數服務新選區，或者挑戰現任民主派區議員。

建制中人普遍認同區選掛「雙牌頭」係有必要，因為新選區變數大，若唔用「雙牌頭」統合建制票源，單靠工記個名恐怕勝算大打折扣。現時工記成員要掛「雙牌頭」，必須經會內嘅政務委員會批准。委員會成員KK承認，准許掛「雙牌頭」無清晰準則，強調「最重係贏到(議席)」，佢認同部分選區嘅工記同民記票數接近，整合後可提高勝算。民記方面，接受「雙牌頭」申請嘅係中央委員會，中委會成員陳克勤話，民記對政治盟友申請使用其牌頭持開放態度。

不過，有民記中人就不滿工記持「雙牌頭」人士喺選戰時「舔盡」民記資源，到立法會選舉就回復單一工記身份，淨係幫工記拉票，仲點名話連續兩屆區選掛「雙牌頭」嘅譚美普就係經典例子。當年工記高調同民記切割，現時工記一班準參選者見形勢不妙，就揀重新「合體」，為咗贏議席真係咩都舔到盡。