政Whats噏：激進派人才凋零　出戰勢做炮灰

區議會換屆選舉明年11月舉行，各路陣營密鑼緊鼓備戰之際，惟獨激進派嘅社民連同人民力量(人力)未見有大動靜。社民連多名核心成員有案在身，包括主席吳文遠、外務副主席黃浩銘等都預期無法出選。至於人力將主攻九龍東及新界東，集中挑戰自動當選嘅建制派區議員，但在缺乏明星人選下，該黨副主席譚得志(快必)亦承認無乜勝算。激進派陣營人才凋零，出戰區選隨時再做炮灰，無力改變目前「捧蛋」嘅困局。

社民連喺2015年區議會選舉全軍盡墨，人力亦只有譚香文喺黃大仙區取得一席，但譚翌年退出人力，自此激進派陣營喺區議會「捧蛋」，而呢個衰敗趨勢好有可能延續到明年換屆選舉。其中社民連有份參與民主動力嘅諮詢機制，但係至今只有該黨常務委員陳皓桓表明會接替官司纏身嘅黃浩銘報名出戰沙田瀝源選區，呢個選區係黃經營多年，陳亦係黃上次區選嘅選舉經理，不過陳始終係選戰新丁，代黃出戰勝算只會有減無增。

社民連內有選戰經驗嘅，好似吳文遠同副秘書長周嘉發等亦有官非待審，相信都入唔到閘。剩下稍有知名度嘅只有前東區區議員曾健成及內務副主席周諾恆，前者回覆查詢時表示仲未決定選唔選，後者就講明想搞土地同福利議題多過落區。吳文遠就話黨內未敲定明年區選出戰名單，但承認該黨只係「配角」，「都係睇吓邊區無(民主派)盟友落去挑戰，咪由我哋派人去『塞位』囉」，選戰未開始似乎已提早投降。

人力方面，將由快必領軍主攻九龍東，另派兩人出戰新界東將軍澳區。快必表明所有自動當選嘅建制派區議員都係佢哋目標，而佢傾向想做「巨人殺手」，即有意挑戰兩名身兼立法會議員及觀塘區議員，包括民建聯柯創盛及工聯會何啟明。不過，快必喺上次區選出戰東區區議會小西灣選區，狙擊工聯會王國興失敗，輸成700幾票，狙擊能力成疑。如此看來，社民連同人力勉強出戰區選，多數玩嘢不成，反而慘敗做炮灰收場。