高鐵未通打風唔返工？　霸氣主管：一千號風球都要返

打風唔使返工，係打工仔的理想，但理想與現實之間，就算怎麼伸盡手臂亦有一些距離。超強颱風「山竹」周末闖港，有打風都要上班的市民已開始想辦法如何上班。有高鐵西九龍站的職員就提出，西九龍站屆時尚未正式提供服務，「山竹」襲港期間可否不上班的疑問，卻遭霸氣主管回應：「如果以份約來計呢，你一千號風球都要返工！」

高鐵香港段於本月23日正式通車，現時西九龍站正作通車前準備，而「山竹」可能成為首個考驗。有聲稱是西九龍站職員在WhatsApp向主管詢問，「如果咁大風球之下，搭唔到車搭唔到的士，返唔到工，員工可以怎麼辦？」

部門主管就指，合約早就訂明職員在打風期間也要上班，但屆時如何乘車上班，就要同事自行解決，「你當係公營機構，你睇下醫院呀，甚至差館，那些一億號風球都要返工。所以大家唔使點理佢係咪打風，你哋都係要返工。」

其後職員再問，若黑色暴雨警告訊號或8號風球期間上班出了意外，會否有公司保險保障，及颱風期間有關車費會否獲補貼等問題，但最後只是換來主管回應：「見工時合約已寫明。」

東網現正向港鐵查詢，正等候回覆。