政Whats噏:成功娶妻即閃? 袁彌昌:避角色衝突

20180914
東網電視
更多新聞短片
袁彌昌(黑衫)話為免被批評公私不分所以請辭,一心做成功女人背後嘅男人咁話。
新民黨立法會議員容海恩(Eunice)同該黨政策總裁袁彌昌上月拉埋天窗,事後更承認係奉子成婚,好事成雙。不過袁彌昌原來月初已經向新民黨請辭,唔通佢娶得美人歸後,就立刻閃人咁現實?
其實袁彌昌並非閃人,而係內部調職,調去同樣由葉劉淑儀創辦嘅匯賢智庫做政策顧問,據了解,有關調職安排上月底已經出現喺新民黨嘅內部電郵,換言之,即係袁彌昌娶咗Eunice唔夠一個月就有咁嘅決定,唔通發生咗咩事?
袁彌昌就解釋佢係自願調職,皆因佢現時新民黨政策總裁一職,好多工作都同立法會千絲萬縷,為免被人批評佢公私不分,偏幫老婆Eunice,決定主動避免角色衝突,一心做成功女人背後嘅男人咁話。袁彌昌又話去到新崗位,可以更集中研究工作喎,而佢未來主要睇大灣區發展,而青年同教育議題亦會睇埋,希望新工作有更大發揮喎。