政Whats噏：容海恩入媽媽谷學習　神秘唔講BB性別

將成為立法會首位任內生B嘅議員容海恩(Eunice)，懷孕4個月，而正常照超聲波已可知道BB性別，但Eunice今日(15日)就大賣關子，話自己知阿B係男定女，不過就唔講住，話臨生前再公布。但作為新手媽媽，佢已經急不及待加入媽媽谷，同其他一樣預產期喺2月嘅媽媽交流嘞。

Eunice話，班媽媽會分享好多懷孕資訊，好似擦咩油可以防妊娠紋，又有咩要注意等，但佢怕擦到個身黐立立，依家未開始擦。講到遲吓可能會半夜腳抽筋，佢就「吓」咗一聲，話依家無喎。咁第時係咪叫老公袁彌昌起身按腳？Eunice戲稱，老公唔會睬佢，仲會踢佢落床添。

不過，話說新民黨主席兼議員葉劉淑儀(葉劉)當年都係高齡產婦，葉劉話當年因爲賀爾蒙分泌不足，懷孕後要臥床休息，同Eunice好唔同。佢又話政府成日講創新科技，應該考慮吓用投影或其他技術，讓Eunice放產假都可以投票。至於將來會唔會同BB上契，葉劉話要問媽媽，Eunice即刻話求之不得喇。睇嚟呢位BB未出世已經集萬千寵愛在一身啊！