特快公屋編配揀樓　劏房夫婦唔揀凶宅：驚有鬼

咩原因連凶宅都唔驚？係無屋住呀！房屋署新一期特快公屋編配計劃家庭申請今日(21日)開始揀樓。從事地盤的姚先生一家4口輪候公屋8年，現時與母親同住將軍澳300多呎公屋單位，生活環境擠迫，「兩個女都瞓地下」。

姚一家先後獲派青衣及荃灣屋邨，但因位置「山旮旯」而拒絕編配，他表示現時只剩下一次揀樓機會，希望揀中將軍澳。他直言不太擔心問題單位：「有啲免租8個月梗係唔揀，零優惠個啲應該無問題啩。」

不少申請人對凶宅避之則吉，姚卻指：「應該唔驚啩，無得住都無計，一等又8年，人生有幾多個10年，小朋友你唔話畀佢聽就得啦。」他又批評房署早前編配的位置差：「離晒譜，三四十年樓齡，又山旮旯，點住，等左咁耐好唔啹，畀都畀啲似樣啲，仲慘過凶宅！」

戴先生一家5口與父母合共7人居於荃灣400多平方呎單位，「得一個廁所，好唔方便」，他申請公屋已8年但仍未能上樓。特快公屋包括曾發生縱火、追債事件，他表明不介意，惟獨凶宅「有啲棹忌」，「始終有細路，心理壓力大」。

輪候公屋8年的巴基斯坦裔Ahmad一家5口現時居於大角咀一舊樓，山竹襲港期間，他居住的唐樓天台鄰近地盤有升降機鐵軸倒塌，驚險萬分，幸而未有受傷。他表示現時200多呎的單位月租索價6000港元，但一家只靠他每月2萬多港元收入。他嘆謂：「兩年加租1000蚊，又要成日搬。」

他表示現時已獲派蘇屋邨一單位，約374平方呎，希望透過特快公屋編配計劃，申請較大單位。他直言不怕凶宅：「無所謂，醫院都咁多『人』。」

楊先生2004由內地來港，開始申請公屋，至今等候14年仍未上樓，他與太太現時居於荃灣約70平方呎劏房單位，居住環境惡劣，「淨係放到張床，有老鼠曱甴，想快啲上樓」。不過他表明不會揀凶宅，「始終迷信，驚有鬼」。

房屋署新一期特快公屋編配計劃接獲約5.83萬份申請，超額申請44倍，首批供家庭申請者申請的690個單位，當中有4個是兇殺案單位，包括屯門友愛邨愛暉樓12樓一個單位、香港仔田灣邨田康樓25樓一單位、觀塘順天邨天權樓及沙田沙角邨綠鷺樓16樓一單位。