政Whats噏：陳帆風災後失蹤　張炳良護短話係分工

「山竹」襲港翌日周一(17日)交通大癱瘓，港府堅持「停課不停工」嘅決定被全城鬧爆，其中運輸及房屋局局長陳帆喺風災後失蹤多日，至今仲未親自為交通甩轆解畫，成為最大箭靶。運房局前局長、任內同樣被萬箭穿心嘅張炳良今(21日)被問到陳帆喺風災善後嘅表現，佢就力撐陳帆，話唔信對方「潛水」，又為陳開脫指風災或由保安局統籌，擺明護短。

曾經作為熱廚房一員嘅張炳良話，政府內部有分工，指今次「山竹」可能由保安局統籌成個風災過程，「可能包括埋交通」，佢相信運房局有參與善後安排，「陳帆肯定有牽涉在內」，拒絕相信陳帆被指風災後失蹤多日嘅言論。

幫完陳帆解圍，張炳良又嘗試幫港府開脫，指天文台喺周一清晨5時20分先由8號風球轉為3號風球，距離上班時段剩番好少時間，「可能啲市民朝早6點幾已經返緊工」，淨係形容事件係「不幸」，但係就未有提港府喺事件有咩責任。

張炳良大呻近年做公務員唔會獲得市民掌聲，指早年擔任消費者委員會主席時，都不時收到市民嘅感謝信，但係而家市民只會將政府服務視為理所當然，籲有意投身公務員嘅人要有心理準備。